ازاى تتعلم كل حاجة فى علم تحليل البيانات بسهولة ... ريح نفسك
إزاي تبقى عارف كل حاجة عن الExcel أو الSQL أو Tableau أو غيرهم في مجال الData Analysis؟
طبعا السؤال اللي فوق ده غلط، لأن مفيش حد عارف كل حاجة عن أداة معينة أو لغة
معينة، ولكن...كان أحد أساتذتي في العلوم الإسلامية دايما يعلمنا ويقولنا الجملة ديه:"معرفة مَظانّ العلم نصف العلم" ☝👀
يعني ببساطة إنك تكون عارف (أماكن العلم) ده انت كده قطعت نص الطريق للعلم، لأن اللي بيبقى عارف أماكن العلم فين بيعرف يدور عليه ويوصله بسهولة، أو بلغتنا الدارجة: "خد فكرة واشتري بكرة"إيه علاقة ده بالData Analysis أو أي مجال تاني؟علاقته بإنك محتاج تعدي على معظم المنهج المتاح للأداة اللي انت بتشتغل بيها أو لغة البرمجة اللي انت بتكتبها، تعدي على المنهج بسرعة عشان تاخد فكرة عن كل حاجة، مش محتاج تكون فاهم كل تفصيلة ولا تكون جربت كل حاجة بإيدك، بس لما تعدي على المنهج بسرعة هتبقى عارف إن اللغة ديه فيها command بيعمل حاجة ليها علاقة بموضوع معين، ده هيتخزن عندك في الذاكرة تخزين خفيف كده، بحيث في يوم من الأيام لما تبقى عطلان في مسألة صعبة والحل بتاعها مقعد، هتفتكر إن كان فيه command معين في لغة البرمجة ديه أو خاصية معينة في الأداة ديه بتحللك المسألة ديه بسهولة، حتى في الغالب ممكن متبقاش فاكر اسم الcommand ولا الsyntax بس انت عارف إن هو موجود بالفعل عشان انت عديت عليه قبل كده، فا هتروح بكل بساطة لجوجل وتكتب مثلا:- "Excel formula to split text"- "How to join 2 tables on multiple keys in SQL?"وهتلاقي الإجابة بسهولة، عشان انت كنت عارف مظان العلم ده، انت كنت عارف إن الحل ده موجود أصلا في اللغة ديه أو الأداة ديه، بس مش فاكر الحل بالظبط، وأكيد انت مش قاموس Excel Formulas ولا قاموس SQL Commands ولا مطلوب منك تحفظ كل ده، لكن اللي يخليك شاطر ويختصر عليك وقت كتير، إنك يكون عندك فكرة عن إمكانيات الحاجة اللي انت بتستخدمها، ويكفي إنك تكون عارف الkeywords اللي هتدور بيها على جوجل، ديه لوحدها هتسهل عليك كتير.أنا اكتشفت مع الوقت إن في حاجات كتير كنت بقعد أجيبلها حل بعيد وأكتبلها كود طويل، أو حاجات كنت بقعد أعملها بطريقة manual وبتستهلك وقت كتير عشان كنت متخيل إن الأداة اللي بستخدمها ديه مبتعرفش تعمل كده، في حين إني لما بسأل حد أكبر مني خبرة ألاقيه بيقوللي طب ما تستخدم الFormula الفلانية أو الCommand الفلاني وهيعملك نفس اللي كنت بتحاول تعمله ده في ثانية...لذلك أنا شايف إن مهم جدا للي عايز يبقى شاطر وسابق عن اللي حواليه إنه يبقى عارف مظان كل علم هو بيشتغل بيه، وده متاح بأشكال مختلفة، يعني هتلاقي كورسات كده اللي هي بتجمعلك أشهر Excel formulas في كورس واحد تلاقي فيه مثلا أشهر 100 formulas، أو بإنك تقرأ SQL cheat sheet أو بإنك تتابع content creators في المجال بتاعك فا تلاقيهم بينزلوا فيديو عن كل حاجة بتنزل جديدة في الأداة اللي انت بستخدمها، أنا مثلا من الطرق اللذيذة الخفيفة اللي بتعلم بيها في الExcel إني بتفرج على الناس اللي بتعمل فيديو ١٥ ثانية كده يوريك فيه شرح لخاصية معينة أو معادلة معينة، وكل يوم بتفاجيء بحاجات مكنتش أعرفها، وفي طرق تانية كتير، كل واحد يشوف إيه الطريقة الأنسب بالنسباله ويمشي فيها.
منقول
خارطة الطريق 👈👈
تعليقات
إرسال تعليق